wazungu wa unga wabuni njia mpya.

Wazungu wa unga wabuni njia za siri kuwakwepa polisi

Na Hafidh Kido

Kila kukicha mbinu mpya za uingizaji na usambazaji dawa za kulevya nchini hubuniwa na wauza dawa hizo maarufu ‘mazungu ya unga’, kwa lengo la kukwepa vyombo vya usalama.

Raia mwema limeweza kuibua mbinu mpya inayotumiwa na wauzaji wadogowadogo wa dawa hizo maarufu ‘mapusha’ ambao si rahisi kuwafahamu kwani ni vijana wanaoishi katika jamii na kushiriki katika shughuli zote za kijamii.

Mbinu hiyo ni kutundika jozi ya viatu vinavyopendwa na vijana aina ya ‘All Star’katika nyaya za umeme kwa lengo la kuonyesha kuwa eneo hilo dawa zinapatikana. Uchunguzi wa Raia Mwema, umebaini kuwa katika wilaya ya Kinondoni jijini Dar es Salaam mbinu hiyo inatumiwa sana katika maeneo ya Tandale, kinondoni mkwajuni, msasani, Kinondoni B katika  mitaa ya Wibu, Togo na Ufipa.

Ni vigumu kuamini lakini juhudi za gazeti hili ziliweza kukutana na  mtumiaji wa dawa hizo anaeishi mtaa wa Wibu Kinondoni ambae hakutaka jina lake litajwe gazetini alisema;

“Sina uhakika sana na mbinu hiyo ya kutundika ‘All Star’ juu ya nyaya za umeme kuwa ni alama ya kuuzwa mdude (dawa za kulevya), lakini naweza kukubaliana na maneno yako kwani maeneo yote kunakouzwa ‘mdude huwaga’ nakuta alama hiyo.

“Zamani tulikuwa tunaiga wamarekani kutundika ‘All Star’ katika nyaya za umeme, sasa hata sijui kuna uhusiano gani na biashara hii. Ila naweza kukuthibitishia kuwa ni kweli kila kunapouzwa ‘mdude’ huwa kuna viatu aina ile,” alimalizia.

Raia Mwema, ilijaribu kumtafuta kijana mmoja anaeishi mtaa wa Togo Kinondoni B ambae alitajwa na mtumiaji huyo kuwa ndie ‘pusha’ muuzaji wake; ingawa nae alikiri kutofahamu chochote kuhusiana na alama hizo kutumika na wauzaji, ila alipobanwa na maswali alisema;

“Mimi naona tu maeneo mengi ninapokwenda kununua ‘busta’ (kifuko cha dawa za kulevya chenye uwezo wa kuzalisha kete 200 mpaka 250), huwa nakuta ‘All Star’ zimetundikwa juu ya umeme lakini kiukweli sijui maana yake nini.

“Kwa mfano mtaa wa Ufipa karibu na ofisi za CHADEMA kuna dogo ‘anabana mzigo’ (anauza dawa) pale au ukienda bonde la mkwajuni pembeni ya barabara utakuta viatu vingi vipo juu ya umeme pale pia kuna jamaa wanabana mzigo,” alisisitiza muuzaji huyo kwa sharti la kutotajwa jina lake kuhofia kukamatwa.

Ilibidi gazeti hili livae uhusika na kuamua kuingia katika kijiwe cha wauzaji na watumiaji dawa dawa hizo katika mtaa wa Ufipa Kinondoni makaburini, hali aliyokutana nayo mwandishi wa gazeti hili ni mbaya sana kwa watumiaji wa dawa hizo.

Asilimia kubwa ni vijana wadogo kati ya miaka 15 mpaka 25, mazungumzo yanayotawala vijiwe hivyo ni namna ya upatikanaji wa pesa kwa njia ya wizi ama kujadili jaribio la wizi lililoshindikana ama kufanikiwa.

Mwandishi alifanikiwa kujifanya kama mtumiaji kwa kubadili sauti yake na kuwa kama mvutaji ila ujanja uliotumika ilikuwa ni kununua kete na kudanganya kuwa atakwenda kuvutia chumbani kwake ili kupoteza malengo. Cha kufurahisha ni kuwa eneo hilo nalo kulikuwepo viatu hivyo juu ya nyaya za umeme, mwandishi alipouliza maana ya alamaa hiyo majibu yalikuwa hivi;

“Si unajua tena wana wanapenda kujifananisha na unyamwezini (Marekani), hii haina maana yoyote mbwembwe tu za kujifanya nao wako mbele,” alijibu mmoja wa watumiaji wale huku akijitahidi kuutafuta mshipa wa kujidunga dawa hizo.

Lakini mwandishi alipojaribu kudadisi mvutaji mwingine alisema; “Unajua mwana nini huu mdude hauhitaji alama mimi nikisikia (alitaja jina la muuzaji wa kijiwe hicho) anauza mdude nitamwambia mwenzangu, na huyu atamwambia yule basi wateja wote utashangaa wanakufata hata saa sita ya usiku.”

Timu yetu haikuishia hapo bali ilikwenda katika ofisi za  kikosi cha kupambana na dawa za kulevya nchini na kukutana na kamishna msaidizi mwandamizi wa polisi, ambae ni mkuu wa kitengo cha kudhibiti dawa za kulevya nchini Godfrey Nzowa, na kueleza kuwa anazo taarifa za kila mbinu mpya inayotumiwa na wauzaji wakubwa na wadogo wa dawa za kulevya nchini, kwani wana vijana wao katika kila eneo linalosifika kwa biashara hiyo.

“Hiyo mbinu nimeisikia kutoka kwa vijana wangu, lakini nasi pia hatuna uhakika nayo kwani bado ni mpya ila tutaufanyia kazi utafiti wenu,” alisema Nzowa.

“Sisi tunafuata sheria ya kudhibiti dawa za kulevya sura ya 95 ‘The drugs and prevention of illicit traffic in drugs’ ambayo inaegemea sana katika waingizaji kuliko watumiaji na wasambazaji, ingawa upande huo nao hatuufumbii macho,” aliongeza.

Akifafanua juu ya madhara kwa watuamiaji afande Nzowa, alieleza kuwa mtumiaji anatumia gramu 0.11 mpaka 0.01 ambayo hiyo ni kete moja, akatoa mfano mtu akiingiza kilo moja ya dawa za kulevya ataharibu idadi kubwa ya watu wapatao milioni.

Hata hivyo kwa mujibu wa afande Nzowa jeshi la polisi linakumbana na changamoto za kukosa fungu la kutosha kutoka serikalini pamoja na wanajamii kwani alidai wauzaji wa dawa za kulevya ni watu wenye uwezo mkubwa kifedha.

“Mwaka jana tulikamata kilo 264 za heroin ila mwaka huu mpaka kufikia mwezi wa tano mwishoni tumeshakamata kilo 250; utaona tatizo halipungui bali linazidi kuongezeka, na sababu kubwa ni kukosa ushirikiano kutoka kwa raia wema hasa kukosekana kwa elimu ya kutosha,” alisisitiza.

Nzowa, ambae ndie mkuu wa kitengo hicho kwa jeshi la polisi alidai kuwa vijana wake ambao wapo chini ya kikosi kazi kilichoundwa na Rais Kikwete mwaka 2006 ili kukomesha uingizwaji na uuzaji wa dawa hizi wamesambazwa katika maeneo yote yanayoonekana ni tishio kwa biashara hiyo na sehemu zote za usafiri kuanzia bahari, hewa na barabara.

“Vijana wetu wapo kila sehemu na wanafanya kazi usiku na mchana kuhakikisha biashara hii inakoma, kwa mfano jiji la Dar es Salaam maeneo yaliyoshamiri biashara hii ni Mzizima, Mafia, Wibu, Togo na Mandazi Road Msasani. Maeneo yote hayo tuna watu wetu ambao wanatupa taarifa kila asubuhi,” aliongeza Nzowa.  

Nae kamishna wa tume ya kudhibiti dawa za kulevya Christopher Shekiondo, alikiri kuwepo kwa elimu ndogo ya vita dhidi ya dawa za kulevya na kulalamikia fungu dogo wanalopata kutoka serikalini.

“Kazi yetu ni kuratibu namna ya kutoa elimu dhidi ya dawa za kulevya na kuwafikia waingizaji, wasambazaji na watumiaji lengo likiwa ni kujenga urafiki na kuwaeleza ubaya wa biashara hii. Lakini kazi hiyo inahitaji pesa nyingi kwani kuweza kuwafikia watu wote hao lazima uwe na kiasi cha kutosha.

“Hatuhusiki sana na wauzaji wadogowadogo wala watumiaji, kazi hiyo tumewaachia wenzetu wa jeshi la polisi mashirika yasiyo ya kiserikali sisi ni waratibu tu,” alidai Shekiondo.

Ingawa alikiri kuwa yapo mashirika ya nje yanayowapa msaada wa kifedha na kimbinu lakini wananchi nao wanapaswa kusaidia vita hii kwani mara nyingi wauza dawa za kulevya wanapoonekana na utajiri wa haraka husifiwa katika jamii.

“Biasharaa hii inaonekana kuwavutia vijana wengi kwani ina utajiri wa haraka, zipo nchi zinatoa hukumu ya kifo lakini unasikia kila siku watu wanakwenda. Tumeamua na sisi kuweka adhabu kali iwe fundisho.

“Adhabu ya sasa ni kifungo cha miaka isiyozidi ishirini lakini April mwaka huu bunge lilipitisha sheria mpya sidhani kama Rais ameshaitia saini lakini ikikamilika anaekamatwa na dawa za kulevya za viwandani kama madras, cocaine ama heroin adhabu yake itakuwa ni kifungo cha maisha,” alisisitiza Shekiondo.

Tatizo la dawa za kulevya nchini limekuwa sugu hasa ikizingatiwa ni biashara inayohusisha watu wenye pesa nyingi wengine wakiwa viongozi wa juu serikalini.

Lakini mwaka 2006, Rais Kikwete aliamua kutangaza vita dhidi ya wauzaji dawa za kulevya, na miaka ya hivi karibuni aliingia katika mzozo na viongozi wa dini kwa kudai kuwa atawataja vigogo wa dawa za kulevya miongoni mwao wakiwa ni viongozi wa dini.

Kwa kuonyesha kikosi kazi cha Rais Kikwete kipo makini wiki iliyopita walikamatwa raia wawili wa kigeni Edwin Swen kutoka Liberia na Benjamin Anuorah kutoka Nigeria, ambao walikamatwa katika uwanja wa ndege wa kimataifa wa Mwalimu Nyerere wakielekea nchini Liberia kupitia Kenya ambapo walikamatwa na pipi 150 wakiwa wamezimeza tumboni.

Taarifa iliyotolewa na ofisi ya kamishna msaidizi Godfrey Nzowa, inaeleza kuwa pipi hizo kwa pamoja zilikuwa na thamani ya Tsh 109,395,000/= watuhumiwa hao walikuwa wakiendelea kutoa pipi nyingine tumboni.

 KIDO JEMBE 

0752 593894