Bomoabomoa yaja Morogoro Road...

WAKAZI wa Jiji la Dar es Salaam hususan maeneo ya karibu ya Barabara ya kwenda Morogoro wametakiwa kukaa chonjo kutokana bomoabomoa itakayozikumba nyumba mbalimbali ili kupisha upanuzi wa barabara hiyo kwa urefu wa kilometa 200 kutoka jijini kwenda Morogoro.

Waziri wa Ujenzi, Dk John Magufuli alisema hayo jana alipozungumza kwenye mahafali ya nne ya Chuo Kikuu cha Mtakatifu Joseph, Kitivo cha Uhandisi na Teknolojia jijini hapa.

Alisema barabara hiyo inatarajiwa kujengwa njia sita umbali wa kilometa 200 kutoka Dar es Salaam kwenda Morogoro.

Waziri aliwatahadharisha watu waliojenga kwenye hifadhi ya barabara waanze kuondoka ili kupisha upanuzi huo kabla hawajaondolewa kwa nguvu.

“Wote waliojenga kwenye hifadhi ya barabara waanze kujiandaa kuondoka kwasababu sheria ni msumeno,”alisema Dk Magufuli.

Akizungumzia wahitimu walitunukiwa shahada na stashahada jana hiyo, aliwataka wahitimu hao kwenda kufanya kazi kwa kusimamia sheria na kuzikabili changamoto zilizopo katika jamii.

“Mkubali changamoto hata kama ni kwa kulaaniwa maana ni afadhali kuuawa kwa kukataa rushwa kwasababu utakuwa umelikomboa taifa,”alisema.

Pia alimwagiza Mwenyekiti wa Bodi ya Wakandarasi, Profesa Ninatubu Lema kuwapatia usajili wanafunzi wote waliohitimu chuoni hapo na wale wanaoendelea na masomo ili watakapokuwa wanatafuta kazi wasisumbuliwe.

Alisema hadi sasa kuna wahandisi 11,400 waliosajiliwa na makandarasi 9,126. Pia waziri huyo alitoa zawadi ya Sh1 milioni kwa wahitimu waliofanya vizuri katika masomo yao.

Chanzo:http://www.mwananchi.co.tz