Jamani eennhh...?!!! leo jembe kakumbuka enzi zake za mshairi atiii....

(1)Hakuna Mkamilifu

Kunradhi waungwana, watungaji maarufu

Napenda yangu kunena, maneno ya tahalifu

Kuaridhia sufufu,

Sufufu wenye maana, ndio ninowaarifu

Siyo wanaojivuna, kumkiuka Latifu

Hakuna mkamilifu, kila mtu kapungua

Kwa wazee na vijana, bingwa na sahaulifu

Wakarimu na hiana, bozi na hao kumbufu

Walioijaza kufu,

Kufu ya kuridhiana, walio hai na wafu

Walio kisaidiana, kwa mambo matambulifu

Hakuna mkamilifu, kila mtu kapungua

Ni vema kuambizana, hapana mkamilifu

Mkamilifu Rabana, Muumba wetu Raufu

Kauli hii sadifu

Sadifu amini sana, ndio kweli sadikifu

Kwa mlimwengu hakuna, jaza yetu ni pungufu

Hakuna mkamilifu, kila mtu kapungua

Hakuna kubishana, kujifanya takilifu

Tumwachie Subuhana, isemavyo misahafu

Vitabu vitakatifu

Vitakatifu twaviona, bashiri hilo nasifu

Dhana nyingine hapana, huo ndio upunjufu

Hakuna mkamilifu, kila mtu kapungua

Mathias Mnyampala (Diwani ya Mnyampala 1962)

(2)Mtu Bora

Mtu bora mwelekevu, ni mwiko kuwa na chuki

Na shida kuwa mtovu, katika mambo ya haki

Mtu bora hana wivu, wala choyo hakitaki

Wala si mtu mvivu, na kwa wote ni rafiki

Na kwa hivi ana nguvu, daima katika dhiki

(3)Tulivyo

Haji duniani mtu apendavyo,

Wala haondoki kama atakavyo,

Hanayo hiari ya kufanya hivyo,

Hawezi kusema kuwa hivi sivyo,

Lakini Mwenyezi ni aamruvyo,

Mwenyezi hakika ni aamruvyo,

Hatuwezi kukana ikawa sivyo,

Wala kunena ya kuwa hivi ndivyo,

Hiyo ndiyo namna sisi tulivyo,

Na namna yetu ikiwa ni hivyo,

Ni wajibu wetu kufuata vivyo,

Ndipo tuwapo watu kama tulivyo,

Kuwa juu yetu Mungu huwa ndivyo,

Mfadhili wetu kumkana sivyo,

(4)Ulimwengu wa kelele

Kila mtu ana kima, cha chini au kilele

Watu wengine wazima, wengine wana uele

Wengine wana heshima, wengine kajichokele

Wengine wana lawama, wengine thawabu tele

Na wengine wako nyuma, na wengine wako mbele

Ndivyo ulivyo daima, ulimwengu wa kelele

 

Kila kiumbe tazama, ana namna ya hali

Ambavyo ukiipima, tafauti hukabili

Kila mtu ana dhima, na mashaka mbalimbali

Maisha yetu ni bima, tunacheza na ajali

Kisha yaweza kukoma, bila kuwa na muhali

Mauti yatutazama, katika kila mahali

Shaaban Robert ( Mwafrika aimba 1969)

(5)Wakati

Twakimbizana na muda, mfano wendawazimu

Twenda mbio kama punda, au farasi kuzimu

Yametuvimba mafunda, kwa kutamani vitamu

Tunaoneana choyo, kwa uchache wa elimu

Zimetukauka nyoyo, kwa tabia zetu ngumu

Twafanya mambo ambayo, hutenda machakaramu

Kila kitu hakifai, wachache wamestakimu

Kwa pepeo la matlai, jahazi hufika lamu

Kwenda kutafuta rai, kwa mamufti na imamu

(6)Mambo hubadilika

Dunia kigeugeu, na mambo hubadilika

Pazima hupata ngeu, pabovu kusalimika

Shibe hufuata mbweu, wa njaa huyayatika

Wa juu hushuka chini, mwerevu huadhirika

Imamu mshika dini, hukosa kuwaidhika

Mara akenda motoni, kwa dunia kumteka

Muovu hupata njia, hafula akaongoka

Pasipo kutarajia, mwamini akapotoka

Njia uliyokujia, kurudia si mwafaka

Mjuvi akikosea, mjinga huelimika

Machache ya kudasia, hujaa yakafurika

Mwema mshika wosia, mara hiyo hugeuka

Subira mwanzo wa heri, na shufaa kadhalika

Saburi huleta mazuri, mabaya kukuepuka

Ajabu hupendwa shari, mama mzaa dhihaka

Ibada na uongofu, sababu ya kuumbika

Kufuru mambo machafu, maudhi kwa mtukuka

Ila twashiba udufu, udhalili na mashaka

Sala na ibada njema, funguo za kuongoka

Kufuata ya karima, huepusha kudhurika

Ajabu tuna nakama, maovu tumeyashika

Hafidh a. Kido 2011