Utabiri wa jembe haujatimia jamani. Fainali ni Yanga dhidi ya Azam FC wapika chapati.... siku ya jumamosi Kagame Cup...

Na hafidh Kido

Yanga ya jangwani leo imefanikiwa kutinga fainali kwa mara nyingine baada ya kuitungua APR ya Rwanda kwa bao moja mtungi katika dakika 30 za nyongeza, bao lililofungwa kiufundi na Hamis Kiiza mnamo dakika ya 10 za mwanzo.

Yanga ambayo ina sifa ya kuchukua kombe hilo mara nyingi kuliko klabu yoyote hapa Tanzania ndiyo mabingwa watetezi wa kombe la Kagame hivyo kutoa nafasi nzuri ya kulibakisha nyumbani kombe hilo linaloandaliwa na chama cha soka cha Afrika mashariki na Kati CECAFA inayoongozwa na Rais wa TFF Leodger Ochila Tenga.

Hata hivyo mchezo wa leo uliingia dosari kwa upande wa Yanga baada ya mchezaji wao Godfrey Taita kulamba kadi nyekundu baada ya kumchezea madhambi mchezaji wa APR mnamo dakika ya 14 ya kipindi cha kwanza dakika za nyongeza; hivyo kuilazimu timu hiyo yenye makazi yake mtaa wa twiga kucheza pungufu kwa dakika zote 15 zilizobakia.

Yanga itakutana na Azam FC iliyoingia fainali ya michuano hiyo kwa mara ya kwanza baada ya kuichabanga bao tatu moja bila huruma timu kongwe ya wekundu wa msimbazi Simba siku ya jumanne katika uwanja wa taifa.

Fainali ya michuano hiyo itachezwa jumamosi katika uwanja wa taifa ambapo imekuwa ni fahari kubwa kwa mashabiki wa soka Tanzania kwani kombe hilo litalazimika kubaki katika ardhi hii iwe isiwe kwa kuwa timu zinazochuana katika hatua ya mwisho ya michuano hiyo zote ni za Tanzania.

HAFIDH KIDO 

DAR ES SALAAM, TANZANIA

26/07/2012

0713 593894/ 0752 593894