Hili ndilo lilikuwa lengo la Serikali ya Mseto... kupooza kila panapofuka kwa kumtumia Seif....

 Makamu wa Kwanza wa Rais wa Zanzibar Maalim Seif Sharif Hamad akizungumza na viongozi wa CUF kwa ngazi ya majimbo na Wilaya nne za Pemba katika ukumbi wa Chuo cha Benjamin Mkapa Wete Pemba.

Makamu wa Kwanza wa Rais wa Zanzibar Maalim Seif Sharif Hamad, ametoa wito kwa wananchi kushiriki kikamilifu katika sensa ya watu na makazi, ili kuirahishia serikali kupanga mipango yake ya maendeleo kwa uhakika.

Maalim Seif ametoa wito huo leo katika ukumbi wa chuo cha Benjamin Mkapa Wete Pemba alipokuwa akizungumza na viongozi wa CUF kwa ngazi za Wilaya na Majimbo.

Amesema Sensa ya watu na Makazi ni muhimu kwa wananchi na serikali kwa ujumla katika kutathmini na kuandaa mipango yake ya maendeleo kwa wananchi, na kuwataka kuachana na mtazamo kuwa suala hilo linaihusu serikali pekee.

Seif ametoa msimamo huo kufuatia wananchi wengi wa Kisiwa cha Pemba kuwa na mtazamo wa kutaka kususia suala la sensa kwa madai kuwa hawakushirikishwa ipasavyo katika suala hilo.

Aidha wananchi wa Pemba wanadai kuwa hawawezi kushiriki suala la sensa, huku wakiwa bado hawajatekelezewa haki zao za kisheria ikiwemo kutopewa vitambulisho vya ukaazi.

Hata hivyo Seif amewataka wananchi kupima faida na hasara za kushiriki kwenye zoezi hilo la sensa, na hatimaye waweze kushiriki kikamilifu kwa maslahi ya maendeleo ya nchi.

Akizungumzia kuhusu mchakato wa ukusanyaji wa maoni kwa ajili ya mabadiliko ya katiba, Maalim Seif amewataka wananchi kuwa huru kutoa maoni yao, na kwamba hakuna atakayeadhibiwa kwa sababu ya kutoa maoni. “Mimi najua wapo wanaotaka serikali moja, wengine mbili, tatu, nne, na muungano wa mkataba, lakini wengine wanataka waachiwe wapumuwe.

Yote hayo ni maoni na kila mtu ana haki ya kutoa maoni yake bila ya kulazimishwa, kwa hivyo wakati wenu ukifika nendeni mkatowe maoni hayo kwa uwazi”, alisisitiza Maalim Seif.

Amesema lengo la serikali ya Tanzania ni kuwa na katiba mpya ifikapo April mwaka 2014, na kufahamisha kuwa kwa Wazanzibari suala kubwa linalowagusa kwenye mabadiliko hayo ni suala la Muungano. “Zanzibar tunayo katiba yetu ambayo imejitosheleza kwa mambo yetu ya Zanzibar, lakini suala kubwa kwenye mabadiliko hayo kwetu sisi litakuwa ni la Muungano, na hili haliwezi kuepukwa”, alibainisha.

Amesema Zanzibar kabla ya Muungano ilikuwa nchi huru iliyokuwa na kiti chake katika Umoja wa Mataifa, na kuelezea haja ya kuwepo kwa Mamlaka kamili ya Zanzibar ili iweze kurejesha kiti chake kwenye umoja huo.

Amewataka wananchi kuangalia maslahi ya nchi yao kwanza katika mchakato wa kukusanya maoni ya mabadiliko ya katiba, na kuachana na misimamo ya vyama katika suala hili linalohusu maslahi ya nchi. “Katiba ya nchi ni mali ya wananchi sio ya chama chochote, lakini najua kila chama kina katiba yake na hiyo ndio itabakia kuwa katiba na muongozo wa chama husika, kwa hivyo ndugu zangu naomba tulifahamu hili na tuangalie maslahi ya nchi yetu kwanza”, alifahamisha.

Na: Hassan Hamad

Ofisi ya Makamu wa Kwanza wa Rais Zanzibar