Leo jembe nilikuwa ofisini kwa dada Badra Masoud, jembe hili.... someni habari yake hapo chini... Hataki mchezo.

Na Hafidh Kido

Shirika la umeme nchini (Tanesco) limeanza kutekeleza maagizo ya waziri mpya wa nishati na madini Profesa Sospiter Muhongo, la kuwashughulikia vigogo wanaolihujumu shirika hilo na kulisababishia hasara ya mabilioni ya fedha.

Akizungumza na Raia Mwema ofisini kwake jana meneja habari na mawasiliano wa shirika hilo Badra Masoud alikiri kuwa kwa muda mrefu Tanesco imehujumiwa na wafanyakazi wasio waaminifu kwa kushirikiana na wafanyabiashara wakubwa kuiba umeme na kutoa siri za shirika.

“Ni kweli Tanesco inahujumiwa shirika limepoteza pesa nyingi ambazo laiti zingeliingia katika mfuko wetu basi Serikali ingepata pato kubwa sana kutoka kwetu; lakini tangu aingie Waziri Muhongo mambo sasa yamebadilika na hatukai ofisini kila siku tupo mitaani kusaka watu wanaolihujumu shirika.

“Waziri Muhongo alishasema bungeni kuwa wapo watu wanalihujumu shirika hili, na akatoa ahadi ya kuwashughulikia wote mpaka kufikia mwisho wa mwaka huu. Ili itakapofika Januari mwakani shirika liweze kufanya kazi kwa faida na kutoa gawio (dividend) kwa Serikali, ambapo ni kinyume na awali ambapo Serikali ilikuwa ikitoa pesa nyingi kuiendesha Tanesco,” alisema Badra.

Aidha akionyesha namna shirika hilo linavyohujumiwa Badra, alisema katika Tanzania hakuna shirika linalofikia Tanesco kwa mapato ikiwa shirika hilo litasimamiwa kwa makini na kuwadhibiti vishoka wanaoliibia.

Hata hivyo afisa habari huyo wa Tanesco alikiri kuwa ongezeko la vishoka kunasababishwa na ucheleweshwaji wa makusudi wa huduma za kuunganisha umeme kama nguzo na meta mpya kwani wapo wafanyakazi wa Tanesco wasio waaminifu ambao hutengeneza matatizo ili waweze kujinufaisha.

“Ni kweli sababu kubwa ya kuongeza vishoka ni kutokana na ucheleweshwaji wa huduma, lakini nikiri kuwa Tanesco hatuna tatizo la nyaya, masanduku ya luku, nguzo wala vifaa vyovyote. Tatizo linakuja pale wafanyakazi wasio waaminifu wa shirika hili wanapowadanganya wateja wetu kuwa kuna uhaba wa vifaa hivyo ili waweze kupata rushwa ndiyo maana wateja wetu wanaamua kutumia njia za panya kuunganisha umeme,” Badra.

Aidha Tanesco kutokana na tukio la kukamatwa mmiliki wa kampuni ya ‘low voltage distribution contractors’ inayomilikiwa na Mussa Mtavaz iliyo Mwananyamala A mtaa wa Mwinjuma juzi jumatatu, wameahidi kufanya uchunguzi ndani ya shirika hilo ili kubaini wafanyakazi wasio waaminifu wanaoihujumu Tanesco wakisaidiana na wezi aina ya kina Mtavaz.

“Pesa nyingi zimepotea tazama zile ‘token’ tulizozikamata jana (juzi), zina thamani ya mamilioni ya pesa, itatuchukua siku kadhaa kuweza kupata thamani halisi ya ‘token’ zile ni nyingi mno. Tena alikuwa akiuza kwa bei ya chini maana umeme ule hana hasara nao hajauzalisha wala hajui unapatikana vipi, anawatumia wafanyakazi wetu wasio waaminifu kuupata na wanauuza.

“Idara ya teknohama (ICT) ndiyo inacyohusika na upotevu huu wa umeme, hatumtaji mtu ila tutafanya uchunguzi na atakaebainika mbali ya kumfuta kazi pia tutamshitaki kwa kulihujumu shirika,” alisisitiza Badra.

Akifafanua namna umeme huo unavyotoka ndani ya shirika hilo alieleza kuwa Tanesco wana mfumo wa usambazaji umeme kuenda kwa wateja hivyo kuna kitu kinaitwa ‘group supply code’ ambayo ndiyo inayotoa ‘token’ za umeme hakuna mtu yeyote anaezijua ‘code’ hizo isipokuwa watu wa (ICT).

“Tumegundua tatizo lipo huko (ICT), maana wao ndiwo wanaosimamia hizi ‘code’ zinazotumika kutoa umeme ndani ya shirika kuenda kwa wateja. Sasa sisi tutahakikisha tunazibadilisha hizo ‘code’ ili hata umeme ukiibiwa usiweze kufanya kazi kwa wateja. Mteja akinunua umeme kwa hawa wezi hata akiuingiza katika mita zao hautofanya kazi. Si hivyo tu hata wale watu ambao walishanunua umeme kwa hawa wezi huko nyuma tutawasaka na tukiwakamata tutawafungulia mashitaka,” aliongeza Badra.

Siku ya jumatatu wiki hii majira ya saa tisa alasiri maeneo ya Mwananyamala A mtaa wa Mwinjuma nyumba namba 182, Tanesco wakishirikiana na jeshi la Polisi lililoongozana na wanahabari walimnasa mfanyabiashara mmoja Said Ibrahim, akiendesha kampuni ya uuzaji umeme iliyopewa jina la utani ‘Tanesco ndogo’ ambapo Ibrahim alimtaja Mussa Mtavaz, ambae alikimbia baada ya kusikia Tanesco watafika eneo hilo kuwa ndie mmiliki wa kampuni hiyo.

Kampuni hiyo iliyosajiliwa kwa jina la ‘Low Voltage Distributors Contractors’ inayojishughulisha na kutandaza umeme majumbani, ilikutwa na mavazi yenye nembo za Tanesco, vyuma maalum vya kupandia nguzo za umeme, nyaraka za wateja wanaotaka kuunganishiwa umeme, lakiri (seal) za meta za luku pamoja na masanduku ya luku, ‘token’ za kuuzia umeme na vifaa vingi ambavyo kwa maelezo yake Said Ibrahim, wamevipata vifaa hivyo kutoka kwa vijana wanaowatumia katika kazi zao.

Kwa maelezo ya majirani wa mtaa huo hakuna mtu aliekuwa akijua shughuli za ofisi hiyo kwa muda wa miaka ipatayo kumi mpaka siku hiyo ukweli ulipobainika.

HAFIDH KIDO

DAR ES SALAAM, TANZANIA

07/08/2012

0713 593894/ 0752 593894