Wizara ya nishati na madini yaikingia kifua TANESCO

Katibu mkuu wa Wizara ya nishati na madini ndugu Eliakim maswi, akizungumza na waandishi wa habari asubuhi hii..

Huyu ni jembe langu Deodatus Balile, Mhariri wa gazeti la Jamhuri linatoka kila wiki. Nilimkuta New Habari akiwa Mhariri mkuu baadae yeye akajivua gamba.

Na Hafidh Kido

Katibu mkuu mpya wa wizara ya nishati na madini Tanzania Eliakim Maswi, ameanza kuonyesha cheche zake kwa kutoa mpango kazi wake utakaoihakikishia nchi kuwa na umeme mpaka mwezi Desemba.

Akitoa tamko hilo la wizara leo asubuhi jijini Dar es salaam, Maswi alisema kiasi cha umeme kinachozalishwa kwa sasa kinakidhi mahitaji na hilo linamfanya kuwa na kiburi cha kukanusha maneno yanayozungumzwa katika vyombo vya habari kuwa nchi itaingia gizani.

“Mahitaji ya umeme kwa sasa ni wastani wa kati ya megawati 650 hadi 720, na hiyo inatokana na mchanganuo wa uwezo wa ufuaji umeme utokanao na maji, gesi asilia, na mafuta,” alisema Maswi.

Akitoa mchanganuo huo Maswi alieleza kuwa kwa mitambo inayozalisha nishati hiyo kwa kutumia maji itazalisha megawati 120 hadi 151. Ambapo kituo cha Mtera kitazalisha megawati 22, Kidatu 54, Kihansi 60, nyumba ya Mungu 3, Hale 3 na Pangani itazalisha megawati 9.

Aidha kwa upande wa mitambo itakayozalisha nishati hiyo kwa njia ya gesi asilia inayopatikana hapahapa nchini ni megawati 348, ambapo mitambo ya Songas itazalisha megawati 180, Ubungo Gas Plant I megawati 77, Ubungo Gas Plant II 50, na Tegeta Gas Plant megawati 41.

Kwa upande wa mitambo inayotumia mafuta ya Diesel kwa kipindi hicho cha miezi mitano watazalisha megawati 240 kwa mchanganuo ufuatao, IPTL megawati 100, Symbion Dodoma 40, Symbion Arusha 40 na Symbion Ubungo megawati 60.

Hata hivyo katika hatua nyingine katibu mkuu huyo wa wizara yenye misukosuko tangu kuingia awamu ya Rais Kikwete, alieleza kuwa suala la kampuni ya kununua na kusambaza umeme nchini TANESCO ambayo ipo chini ya wizara hiyo haiwezi kukosa umeme wa kutosha kwa kukosa mkopo wa bilioni 408, kwani serikali imeshaingilia kati na kutoa ruzuku ya kutosha kuiendesha kampuni hiyo kwa miezi kadhaa bila tatizo la umeme kujirudia.

“Wapo baadhi wanaodhani kwamba suala la mkopo wa shilingi bilioni 408 kwa TANESCO ndiyo njia pekee ya kuhakikisha upatikanaji wa umeme. Hata hivyo kati ya Agosti, 2011 na Juni 2012, Serikali ilishatoa jumla ya Shilingi bilioni 222.4, ambazo ni ruziku na si mkopo.

“Hivi karibuni Serikali imetoa Shilingi bilioni 25 nyingine ili kuhakikisha mafuta ya kutosha yanapatikana ili umeme wa uhakika uwepo. Ni wazi kuwa Serikali inachukua hatua za makusudi kuhakikisha kuwa umeme wa kutosha unapatikana na ndiyo maana mpaka sasa imetoa ruzuku ya shilingi bilioni 247.4 kuhakikisha TANESCO inajiendesha bila matatizo” alisisitiza Maswi.